Z. Petko Petkov

Z. Petko Petkov ka diplomuar në Universitetin e Sofjes, ku ka fituar titullin Magjistër i Shkencave Juridike. Ai ka shërbyer si gjyqtar ndihmës në Gjykatën e Qarkut të Sofjes nga viti 2005 deri në vitin 2007, ndërsa që nga viti 2007 ushtron funksionin e gjyqtarit në Divizionin Penal në Gjykatën Rajonale të Sofjes.

Gjatë karrierës së tij si gjyqtar penal, ai ka trajtuar mijëra raste, ndërsa thelbi i punës së tij ka qenë gjithmonë respektimi i parimeve të Konventës Evropiane për të Drejtat e Njeriut (KEDNj) dhe i jurisprudencës së Gjykatës Evropiane të të Drejtave të Njeriut (GjEDNj).

Nga viti 2014 deri në fund të vitit 2015, ai u emërua ekspert pranë Zëvendësministrit të Drejtësisë të Republikës së Bullgarisë. Gjatë kësaj periudhe, ai ishte përgjegjës për përfaqësimin e shtetit para Gjykatës Evropiane të të Drejtave të Njeriut, si dhe për ofrimin e udhëzimeve metodologjike dhe mbikëqyrjen e veprimtarisë së drejtorisë përkatëse brenda Ministrisë. Përveç detyrave që lidhen me përcaktimin e mënyrës së veprimit (modus operandi) të përfaqësimit procedural pranë GjEDNj-së, ai ishte i përfshirë drejtpërdrejt edhe në hartimin e ndryshimeve legjislative që lidhen me sistemin gjyqësor.

Nga viti 2012 deri në vitin 2015, ai ka qenë ligjërues mysafir i së drejtës penale dhe procedurës penale në Institutin Kombëtar të Trajnimit për Gjyqësorin, ku ka kontribuar në thellimin dhe zhvillimin e ekspertizës së tij në nivel teorik dhe akademik.

Z. Petkov iu bashkua EULEX-it në Kosovë në vitin 2017 si gjyqtar ndërkombëtar penal, ku shërbeu deri në përfundimin e mandatit ekzekutiv të Misionit në vitin 2018. Aktualisht, ai ushtron funksionin e vëzhguesit tematik në fushën e krimeve sipas së drejtës ndërkombëtare në kuadër të EULEX-it në Kosovë.

Z. Petkov u emërua anëtar zëvendësues i Panelit për Shqyrtimin e të Drejtave të Njeriut më 19 dhjetor 2018, ndërsa që nga 1 dhjetori 2023 ushtron funksionin e anëtarit të plotë të Panelit.